蘋果日報  動新聞
台灣  香港 
State Farm 贊助

【前幕後玩家】PR裸辭:你一支酒 我起到間學校

「不嬲以嚟,公關都係我嘅夢想職業,工作其實有好多成功感,我都好滿足,只不過喺商業世界裏面,好多嘢都用金錢堆砌出嚟。」對於喺公關行業打滾咗十年嘅鄭凱恩(Angel)嚟講,公關行業刺激好玩,兩年前佢本來將升職至公關總監,但佢竟然喺「三十而立」呢個人生關口選擇裸辭,為咗去追另一個更大嘅夢——喺緬甸起一間音樂學校。

喺公屋長大嘅Angel,大學公關及廣告系畢業後順利成為「幕後玩家」,同你同我一樣,為生活、為錢拚搏。凌晨收工係家常便飯,最瘋狂試過為搞活動連踩三日冇瞓過。公關工作的確帶畀Angel好多成功感,不過佢心底裏一直有疑問,「二十五至三十五歲嘅人都會有呢個迷失,因為想賺好多錢,要買樓,但生活唔只係講錢。」公關行業五光十色,令佢更感覺到虛無同迷失,「我哋花咗百幾萬去做場地佈置,所有嘢可能一晚就冇晒,喺event入面畀VIP嘅酒,最貴嘅我見過百幾萬一支。你一支酒,我可以起到間學校。」

為咗追尋真正想擁有嘅人生,2014年年底Angel放棄高薪厚職,出走到緬甸十個月,喺金三角地區景棟一間孤兒院義教音樂同英文。當地環境較落後,Angel笑笑口話,「緬甸就係『免電』,冇電嗰時,三個小朋友迫埋一部電子琴裏面,淨係喺度練手指,其實係冇聲嘅,我就拍住拍子,哼住音樂,係無聲音樂堂。」

雖然資源缺乏,不過當地小朋友對音樂充滿熱情,即使冇電、又或者喺攝氏四十度高溫下仍然會繼續練習樂器。義教一段時間,Angel亦見證孩子嘅轉變。有位小男生天生冇咗四隻手指,起初因為只睇到其他人學樂器而失落,但之後老師發現可以安排佢學打鼓同聲樂訓練,「佢打鼓嘅節奏感非常強,有次演奏會,當佢表演完後落台,眾人歡呼,佢就扮cool咁笑一下!」呢個笑容令Angel深受感動,「佢發現咗樂趣,原來自己係有價值,音樂可以慢慢建立一位小朋友出嚟。」

喺香港,小朋友學樂器為贏在起跑線,而對緬甸嘅孩子,只為跑在另一條線。Angel表示,景棟位於運送毒品嘅主要交通樞紐,當地兒童非常容易接觸毒品,「喺當地,大約五毫子美金,已經買到一大包K仔;曾經聽聞有人喺當地學校,一個小朋友書包入面搵到毒品,原來係當地警察畀個小朋友,叫佢哋拎返屋企畀家長散貨。」Angel開始思考,究竟可以繼續為景棟小朋友做啲咩?樂器可唔可以取代毒品?

2015年義教期間,緬甸發生水災,Angel同其他老師舉辦首個籌款音樂會,由孤兒院小朋友組成小提琴弦樂團演出,一千個景棟村民,第一次見到咁多部小提琴同時演奏。大家都好驚訝一班小朋友喺短短數月進步得咁快。音樂會嘅成功令Angel再諗多一步,「佢哋音樂天份咁高,音樂中心嘅夢可能可發大啲,真係搞一間音樂學校?」

同孤兒院牧師商量過後,Angel馬上着手搵地、親自同當地官員開會,最後Angel以當地孤兒院名義,買下位於景棟一塊地。緊接喺2016年,Angel成立慈善組織Build A Music School,希望能集合更多有心人令音樂學校夢成真。

喺景棟買地唔難,難在起樓。Angel表示,因為學校將興建喺山上,所以建築材料運費特別貴,除咗修路、修地興建教學大樓、男女宿舍,軟件亦需花費,包括樂器同聘請老師,計劃預算約港幣200萬。由幾部爛電子琴、到成立樂團,買地計劃興建音樂學校,Angel只係話畀小朋友聽,除咗毒品之外,「呢個世界仲有好多選擇,其中一條路就係音樂;每次聽佢哋拉Canon in D嘅時候,我就會淚人咁喊,諗起我哋喺冇任何資源嘅情況下,點樣一步一步去行到台上。」

為咗緬甸嘅小朋友,Angel喺返港後,四出講talk,希望更多人認識音樂學校計劃,仲眾籌出書《緬甸二家姐》,預計今月月底推出,努力諗計籌200萬;而為咗自己,就只係間中接PR相關嘅freelance,賺嘅錢好有限。Angel笑笑口話,緬甸義教經歷令佢成個人唔同咗,就連消費模式都改變埋:「high tea嘅價錢,其實可以買到一包米,養到30個小朋友;喺兩個平行時空生活過,先發現原來邊樣嘢對我生命更加重要。」的確,生活中有啲事情,錢未必買到。

或者你會覺得Angel好傻?世界上咁多小朋友,又救得幾多個?Angel就話,「我讀大學時,有位Professor同我講,Angel呀,呢個世界唔公平o架,你改變唔到啲咩。」呢句說話令佢印象深刻,不過佢一啲都唔認同,「係,世界係唔公平,但唔好畀呢個框局限。未必改變到大事,但只要改變一件好細嘅事,縱使啟發到一個人,影響力都可以好大,同埋係值得嘅。」

Angel笑言,同三十幾人一齊發夢起學校係件浪漫嘅事。敢於發呢個夢,因為佢深信,音樂可以改變人,「我哋嘅小朋友輸在起跑線,看似係蝕底、被忽略嘅一群;但我哋係跑緊另一條路,仍然可以贏在追夢終點上。」

後記
小編喺整理資料時不斷咁諗,假如可以做到公關總監,生活應該過得很不錯,甚至買樓在望?假如小編係Angel,又會唔會甘願放棄工作多年建立嘅一切,隻身走到異地做義工?不過,當翻睇片段見到Angel講起緬甸一班小朋友時,眼中流露嘅熱情同笑意,小編知道自己實在係諗得太多。衷心希望Angel同三十幾位小朋友一齊發嘅夢快將成真。

B.A.M.S. - Build A Music School Facebook專頁
https://www.facebook.com/buildamusicschool/

關於《緬甸二家姐》眾籌出書
http://bit.ly/sparkbams

場地提供:OVOCAFÉ WANCHAI
地址:灣仔灣仔道1號地下(灣仔舊街市內)
電話:2527 6011

採訪:何宛珊(表妹)
攝影:馮峰、Neo
後期:Roy
編導:Kaman
編審:Kaman、仙



十年PR生涯令Angel有唔少滿足感,但佢同時亦感到迷茫。

緬甸景棟環境條件較差,不過小朋友嘅可愛同熱情,令Angel好快投入當地生活。

Angel話小朋友收到牧童笛後好興奮,搞到孤兒院連凌晨都聽到笛聲,非常搞笑。

一班孩子正努力練習電子琴。

呢位小女生彈起小提琴有板有眼!

睇吓Angel對住班細路嘅笑容幾燦爛!

Angel欣賞緬甸孩子有顆感恩嘅心。

Angel試過帶班小朋友到當地軍官屋企附近演奏樂器,軍官聽到樂聲後特意出門讚賞佢哋,冇耐樂團仲獲政府邀請喺外交活動上表演。

從景棟小朋友身上,Angel學識快樂都可以好簡單。

香港有唔少熱心人士慷慨捐贈樂器,支持景棟孤兒院小孩學音樂。

今年暑假,一班本地大學生唔怕辛苦,跑去緬甸幫手起路同義教,為起音樂學校出分力,認真抵讚。(HKOTSSA提供照片)

佢哋輸在起跑線?其實每個人都喺唔同跑道上,各自努力向目標進發,最後一齊贏喺追夢終點上。

回到最上面