蘋果日報  動新聞
台灣  香港 
State Farm 贊助

街坊文具店最後倒數 熟客助清貨 老闆:深深感受人情味

「人情味……真係深深感受到!」過去半年大埔運頭塘商場「其昌文具」老闆羅先生被新業主駿昇迫遷,居民發起聯署簽名;他就四出為小店奔走,到政總請願,又多次與業主就合約交涉,迫使業主提出可遷往商場其他舖位方案,卻被瘋狂加租近7成,「根本就係玩嘢,等你知難而退」。其昌無力負擔租金,下月初結業。離別在即,有街坊花上幾小時用串珠親手制作聖誕樹擺設、小孩則在畫紙寫上心聲,只為向羅生說一句再見。

12月的文具店,擠滿買聖誕卡、小禮物的街坊,店外就貼上「告別街坊」字句。其昌文具店於運頭塘商場開業25年,去年底才與領展續約3年,加租近三成。至今年4月商場易手,業權由駿昇投資(香港)有限公司以8.1億元奪得,今年7月駿昇突向場內6間小店發律師信,包括其昌,要他們下月遷出。

文具店是羅先生大半生心血,過去半年他四出為小店奔走,到政總請願,又多次與業主就合約交涉,嚐盡甜酸苦辣,「最初收到駿昇嘅律師信叫我地走,真係訓唔到覺」。隨後有居民發起聯署簽名行動,「收到幾千嗰簽名,好多街坊支持,真係好感動。」連保安局局長黎棟國夫婦都簽名支持,「黎生嚟過幾次,好關心我地,佢太太都話好可惜。」

一連串行動,最終迫使業主提出小店可遷往商場其他舖位,但魔鬼在細節,新租約業主瘋狂加租近7成,「佢問我地搬唔搬去商場另一位,同樣都係600呎,但租金就收4.7萬蚊,連埋管理費、差餉等雜費,每個月成5萬蚊,我依家都係交緊3萬蚊。」他批評,業主表面上是回應社會訴求,實情是「玩嘢」,「我地賣文具邊搵到5萬蚊?都唔係真真正正解決問題,等你知難而退。」駿昇原計劃租予小店的位置,已瞬即由一間家品店進駐。

努力過後,其昌難逃結業命運,羅先生只能無奈接受,「咁多年啦,始終都係唔捨得」。但最令其最不捨,始終都是街坊的人情味,「人情味……真係深深感受到,我嗰女都話做咗咁多年,咁多街坊鍾意你都無憾啦,講到我都心酸酸。」聖誕是零售業旺季,「我都唔太敢入貨,都喺入啲聖誕卡,好多熟客都好有心,話嚟幫手清貨,但其實仲有3、4成(貨)未清到。」

聖誕前夕,有街坊花上幾小時,用串珠親手制作聖誕樹擺設送予他,「你睇吓整得幾靚,我好開心,嗰街坊整咗幾個鐘,啲人問我賣唔賣,我話呢嗰係街坊送畀我架,唔賣得。」在邨內長大的安仔和力仔,就坐在文具店內畫上自己的心聲,羅生珍而重之掛在當眼處,「佢地好得意架,坐喺到畫咗半個鐘話要送畀我」。

文具店下周四或五正式結業,為感激街坊多年來支持,除了購物有折扣,星期日起文具店更會擺放紀念冊,讓街坊寫下心意。


邱仲權攝

邱仲權攝

邱仲權攝

邱仲權攝

邱仲權攝

邱仲權攝

回到最上面