蘋果日報  動新聞
台灣  香港 
State Farm 贊助

【獨家】大仔Jacques活躍自動錫錫 周汶錡:每一日有唔同快樂

周汶錡(Kathy)同法籍老公Julien生咗兩個囝囝,大仔雷棨宇(Jacques)7月就啱啱2歲,細仔Avner依家就差唔多1個月大,Kathy 同一大兩小三條King做情人,其中「小情人1號」Jacques就越大越萌,Kathy周不時係Ig分享佢啲得意片,10幾、20萬點擊屬等閒事,絕對係星二代「網紅」BB。

Kathy噚日就同《蘋果》獨家帶Jacques去山頂公園玩,Jacques熱身一輪即周圍走,一時同媽咪玩肥皂泡槍、一時踢波、又跳舞又唱歌仔,Kathy一叫「Bisous」(法文,指錫錫),Jacques即自動波錫錫媽咪,真係甜到漏。

Kathy算係新手媽咪,年資未夠兩年,佢就形容自己係一個又hea、又happy嘅媽咪:「我無壓力,我幾hea下,由大肚,到生咗佢出嚟,自己都冇畀自己壓力,佢又無乜壓力,成件事都幾好,無壓力咁發生,我係一個幾輕鬆嘅阿媽,有咩玩具,我盡量唔買,鍾意帶去出邊玩,玩嘅時間多,寧願開心嘅時間多啲。啲人問我佢幾時返學、返學未、報名未,我比較慢啲,遲啲先。」問到佢對囝囝有冇期望,佢就笑言:「自己唔係虎媽,亦唔想做虎媽,冇諗過佢哋大嗰想佢做乜,學校都未搵,step 1未搞,唔會諗到step 2。」

Jacques成日都好好笑容,Kathy就笑笑口話同佢依家關係似小情人:「依家每日都愛死佢,每日都好開心。細嗰個未同佢friend住,都係個幾月,所以同大哥關係係小情人,佢有脾氣,有開心,有扭計,好似大人情緒佢都會有,係一個好得意嘅人仔,佢古靈精怪表情、動作,都係開心。」

Kathy話有咗兩個囝囝,對母親節感覺當然會大咗:「我同仔嘅時間依家開始,上年佢未識講嘢,仲係爬過程,未識同你溝通,未feel到真係所謂母愛,最近呢幾個月有呢種感覺,因為佢真係笑、喊、扭計個種情緒可以feel到,所以好開心,每一日有唔同快樂,每一日佢唔同嘅嘢,我係度笑,佢拍到啲video好搞笑,會同人分享吓,我自己都可能睇無數次,我老公都話我儍咗,見到佢表達、表情,講嘢個種方法好搞笑。」

玩得開心,但係囝囝病嗰時都會牽動做媽咪情緒,好似Jacques上個禮拜就唔舒服扭計,Kathy自言都好心痛:「佢上兩個禮拜病,我都係第一次去接觸佢嘅情緒,肚痾、發燒,啲情緒可能瞓唔著,食唔到嘢,覺得佢好辛苦,我又好辛苦,因為唔知佢想做咩,係咁喊、叫、扭計,你會覺得咩事,會好緊張。」

Kathy做咗媽咪,滿足感每日都唔同,好神奇加好開心,亦更加覺得母親好偉大:「佢成日媽咪媽咪抱抱,未知母親節係咩,當然我同我母親一齊,覺得佢好偉大,會湊兩個仔,做咗母親先知道,母親係最犀利、最好,真係會隨時都all time available,唔會托手踭有籍口,唔得閒,係完全付出。」

採訪:梁錦雯
攝影:郭賢興
攝錄:林德雄、李祉澄


周汶錡話囝囝大咗,feel到佢嘅感情,更覺母親節到來。

Kathy鍾意帶囝囝出外邊玩,唔想俾太多壓力囝囝。


Kathy講一聲「Bisous」,Jacques即自動波錫錫媽咪。




Jacques開始長大,仲有哥哥feel會黐住細佬Avner。(周汶錡instagram圖片)

周汶錡不時都擺Jacques嘅片上ig,賣萌樣好受歡迎。(周汶錡instagram圖片)

(周汶錡instagram圖片)

(周汶錡instagram圖片)

回到最上面