蘋果日報  動新聞
台灣  香港 
State Farm 贊助

【有樓又有夢】巴士大叔退休變宅男 改建女兒房做畫室

我有一個夢,夢想退休後可以做我喜歡嘅事,做到忘餓忘我。呢個夢我上星期開始有,受退休巴士司機、現職宅男的何永富啟發。如果人生勝利組由我定義,佢一定係傑出組員,因為佢有樓?唔係!係因為睡房以外佢仲有間畫室,每日瞓醒就可以走入去畫個不亦樂乎,老婆支持、阿女力撐,仲有貓主子陪畫,點計都係贏!

何永富經常四萬咁口,梗係啦,我係佢,我都開心。人生下半場可以把興趣盡情放大享受,令人葡萄。揸巴士廿年,佢舊年退休。60歲在現今世代只是young old,叫佢大叔貼切過伯伯,有心有力,要重回巴士公司兼職絕對冇難度,佢都有諗過。「好多同事退休後,都有返去繼續做,但個女叫我唔好再做嘢,鼓勵我多啲畫畫,佢話:『你自細鍾意畫畫,而家有機會啦。』」個女開到口,做阿爸嘅當然受落呢份甜絲絲嘅心意。加上阿女之前搬咗出去住,騰空房間,佢決定改建房間為畫室,畫架唔使再拆件收埋之餘,仲有空間掛起畫作展示。「好開心屋企人支持。有時都覺得奢侈,香港地有時咁細間房,要住幾個人!」阿女撐佢投入興趣,佢就自嘲因為有咗呢間房,搞到變咗宅男。「少咗出去行街,有時我一個人喺屋企,朝早開始畫,畫吓畫吓過咗午飯時間都唔知。」好多人退休怕冇嘢做好悶,自學油畫嘅佢剛好相反。「時間真係唔夠用,有時一畫就幾個鐘。」佢奉行活到老學到老哲學,不時上YouTube觀看繪畫教學影片增進知識,最近仲自學水彩畫,毅力,係毅力呀!

難得有間房可改建為畫室,佢決定搬走睡床,再建地台把大大幅的畫布、畫框收納妥當,空間感當堂加倍。地台上鋪上地蓆,阿女要回來留宿一樣冇問題。「之前喺客廳畫畫唔係太方便,畫完就要將畫架收起,而家隨時畫都可以,成日忍唔住走入嚟睇吓又畫吓。」房間有特大玻璃窗迎來陽光及綠油油山景,仔細聽仲有鳥鳴,成件事可以話係配合得天衣無縫。如果我有間咁嘅房,一定會望住外面景色發呆,進入渾然忘我之境。

貓主子陪畫 作品富創意
雖則話佢走入畫室作畫可以忘掉時間,忘卻飢餓,不過總有被打擾嘅時候,之但係佢又心甘情願,貓奴生活就係咁。「有時坐喺度畫畫,佢就跳上我大髀,我就抱住佢畫。」佢作畫風格偏寫實,很多都是旅遊風光,也有創作成份較高的作品,靈感都來自貓貓,包括一幅帶有Andy Warhol風格的二次創作,畫中有佢教訓貓貓嘅情景。「畫嘅時候,佢搞咗啲破壞,就加咗啲貓嘅元素入去。」原來他們這一家喺今年農曆新年先收養呢隻來回地獄又折返人間、捱過車撞的流浪小黑貓,之後全家都變成一等一貓奴。活潑嘅貓貓之前跳咗上佢放顏料板嘅枱上,肉球沾滿顏料,貓仔通屋走,搞到貓印處處。「嗰次梳化、床單上都染晒色,以後都要記得掛起色板。」憶起此事佢丁點怒氣都冇,一直笑瞇瞇。「有咗佢好開心,好似多咗個人陪我玩咁。」

畫室外也有他的畫作,大部份都在門上。「早排裝修,浴室換咗一格格玻璃門,我就將睡房門畫埋一格格襯番,統一啲,當塗鴉咁,唔鍾意將來可以再畫過。我係無聊人嘛!」有閒情無聊,真係一種幸福。退休前做好準備,養一種興趣,唔係為打發時間,而係令下半生每一秒都更高質。

記者:葉青霞
攝影:張志孟

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily


好奇貓愛「打擾」何永富畫畫,不過貓奴相當受落,而且還因牠創作了這幅鄧小平名言「不管黑貓白貓,捉到老鼠就是好貓」畫作。

畫室鋪了地蓆,留了被鋪,女兒要回家留宿不成問題。

房間特別建了地台,收納畫布、畫框及畫架,令畫室能有更多空間。

何永富因貓貓搗蛋而有這幅二次創作,我笑畫中的他看來比真人年輕。佢話:「係呀,美化咗自己。」

1996年加入九巴公司的何永富去年退休,此前他駕駛了60X巴士線20年。

畫室景觀開揚,窗外山林景致令他感覺更悠閒。

何永富是印度華僑,早前跟父親回去印度時,在街頭拍下了當地人照片,回家再畫成油畫。

到訪何永富的家,對「室雅何須大」深感認同。

何永富年輕時曾於廣告公司工作,後來公司遷到內地,為了生活穩定,才轉行當巴士司機。

他自學油畫,愛畫風景,風格寫實。

兩房兩廳的620呎單位,女兒遷出後她的房間變成爸爸畫室。

回到最上面