蘋果日報  動新聞
台灣  香港 
State Farm 贊助

【係愛呀】家居自來雀築巢 戶主唔開冷氣免打擾生蛋

斬樹變滅雀,康文署簡直係生態殺手。大埔鷺鳥林幾日前巢落一地,屍橫遍野,孤雛哀鳴。官方無情,平民有愛,很多民居提供bird-friendly環境讓雀鳥築巢,戶主保持距離,確保雀鳥生得安心,孵得放心。尊重生命,本該如此。

炎夏沒冷氣,真係會出汗出到脫水。因為有「客」暫住,林太已有十幾日沒開客廳冷氣。未夠兩歲的BB女玥玥每日熱到成身汗,陰公豬。「我哋怕影響雀仔孵蛋過程,所以唔開冷氣。開咗冷氣,外面始終會熱啲,又會有聲,驚對佢哋有影響。」頭頂有白羽毛的白頭翁(又稱白頭鵯)會於四至八月繁殖,牠們被林太冷氣機下那株碌柚葉吸引,上月尾在這裏築巢生蛋。為令雀BB順利出生,林太一家都有應變措施──只吹風扇+狂洗面+沖幾次涼!「仲會出走廊行,因為走廊通風,加上小朋友始終比較嘈,多啲出去,就唔怕騷擾到雀鳥。」非常貼心。

自來雀訓練他們這一家的抗熱能力,相信唔係人人頂得順。「呢個係大自然生態,既然佢選擇喺呢度生蛋,就由佢囉,都無影響我哋啲乜。又可順道教小朋友愛護小動物。」記者當日看到雀爸雀媽來來回回叼來昆蟲給雛鳥吃,覺得情境好有趣。林太謂雀仔五月尾開始來探路,再逐點用樹枝、樹皮及廁紙築巢,見證雀仔成家立室過程。林太說:「兩日前,第一隻蛋孵化咗,從未見過咁赤裸裸、無毛嘅雀BB,過程好感動。」對照康文署的無良,尋常百姓家顯得甚有人性。「要將心比己 ,如果你屋企俾人破壞,仲傷害埋小朋友,你都會好痛心。康文署嘅行為,相信除咗我哋,好多人都反感。」

家居同樣吸引白頭翁來築巢的,還有中大新聞與傳播學院退休教授馬傑偉。他對雀鳥很呵護,多次提醒我們拍攝要小心。他笑稱:「其實我都有慾望要影佢,呃幾個like,但我會盡量控制自己。如果驚動到佢,搞到佢整穿啲蛋,甚至踢走孵咗出來嘅雀仔,我會好唔舒服,好唔開心。」原來去年已有白頭翁作客馬家,馬傑偉日思夜想老朋友何時再臨。「佢哋離開後,我一直期待佢哋返來,差唔多六月嗰陣好忐忑,覺得無乜可能。」白頭翁最終在他家露台一盆高掛的植物上再築巢,令他喜上眉梢。「呢種雀仔會喺呢段時間落戶香港唔同嘅友善家居。雀鳥有記憶,我寧願相信呢一巢係舊年嗰對夫婦嘅。一廂情願囉,唔係都當係。」對於與「老友」重聚,馬傑偉笑到四萬咁口。

「我覺得城市人太驚,人哋送份禮物畀你,你驚到要戴手套怕佢污糟。有啲樹好近民居,成棵都係雀巢,好嘈,成地雀屎,我好體諒。但如果我呢度有幾堆雀屎,權衡輕重之後,我寧願尊重生命。」僵化冷血的官僚,幾時先至明白?

記者:葉青霞
攝影:許先煜

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily


林太形容白頭翁築巢很有計劃,幾日間就築好了一個雀巢。巢身連廁紙都有,十分搞笑。

林太覺得可以藉有雀來築巢,教導小朋友愛護大自然。

採訪當日,馬傑偉一直以為家中只有一個雀巢,翌日才發現圖中白頭翁所在位置附近盆栽還有另一巢。

馬傑偉形容鳥蛋孵化,有小生命誕生,並看到牠們成長後飛走是很美好的經驗。(相片由受訪者提供)

回到最上面