蘋果日報  動新聞
台灣  香港 
State Farm 贊助

【受傷203日】墜馬華仔8月復工 馮德倫:第一站係8號出席北京發佈會

【新增回應】
55歲劉德華(華仔)噚日喺華仔天地官方網站留言「Are you ready?」……外界估華仔已完全康復,今日台灣傳媒報道,華仔會復出宣傳新片《俠盜聯盟》,8月10號就去台灣出席記者會同映前見面會,終於可以公開同大家見面,馮德倫回應《蘋果》講到華仔為電影《俠》復工,佢話:「當然開心,華哥可以咁快康復,幫套戲宣傳。劉生到時會喺8月8日同我哋一齊出席北京嘅發佈會,至於之後幾站嘅空傳就要等電影公司安排。」

華仔今年1月17號喺泰國拍廣告時不慎墜馬(新聞連結:http://bit.ly/2iDM6Wu),造成骨盆多處骨折、筋腱肌肉拉傷,返港休養大半年,未有公開露面,不過華仔為咗唔想fans擔心,間唔中就會喺官網向粉絲報告康復進度,fans知華仔終於復出,應該都好放心!

話晒華仔喺《俠》片中,演出之外,仲埋做監製,華仔喺片中演神偷,有唔少動作場面,其中有一場進入密室嘅戲,華仔懸吊喺空中,點知唔小心撞到地洞邊緣,導致頭部受傷,華仔都忍痛完成拍攝;又有一次唔少演員要去工廠拍戲,工廠塵埃好嚴重,但演員又唔可以戴口罩,就連咳嗽出嚟嘅痰都係污糟,嗰場戲佢哋喊咗好耐,把聲有啲啞、喉嚨又有啲痛,儘管環境惡劣,仍然認真對待每個鏡頭,「因為當演員就是這麼辛苦」。

問到劉德華正式復出,幾時會喺香港現身?劉德華經理人公司回應:「其實是各地電影公司依上映時間分別邀請安排。」似乎暗示嚟緊會喺香港宣傳。



回到最上面