蘋果日報  動新聞
台灣  香港 
State Farm 贊助

【捐買衫錢】幫女兒徵二手校服 惜物唔係得個講字

「如果學校有一半人着舊校服,個小朋友就唔係標奇立異了。」育有一女的楊瑾說。舊時邊個唔係着家姐阿哥舊校服?不過呢家人人生一個小朋友,物質又來得容易,大家毫無疑慮就會買新。既然有facebook大神,楊瑾試試求問,結果真的為9月入讀幼稚園的女兒梁楓徵收到冬夏校服和皮鞋。原先預留買校服的錢,她捐到環保組織。

你以為facebook大神有求必應?徵校服過程比楊瑾想像中難,她中間也想過放棄。「問學校有冇平台買到二手校服,學校答冇,我又唔識舊生家長,惟有喺facebook徵求,呃咗百幾個like後就沉底,冇消息。」楊瑾的朋友為她廣傳,但香港幼稚園何其多,配對不易。「有朋友建議我去Baby Kingdom問,可惜網站沒有女女就讀學校的平台,也曾post到facebook上的『二手校服買賣/捐贈站』,屋企附近嘅馬鞍山、沙田區page,結果幾個星期都冇回音。」

為鼓勵家長把校服捐出,她特別聲明會把原本用來買校服的錢,捐到環保組織「綠惜地球」。「讓大家覺得值得,也讓不太接受二手衫的長輩明白,我唔係想慳錢,而係想為環保出力。」一件校服,得來不易,由種棉花計起,消耗了多少資源、造成多少污染?大家一向選擇無視這些,都太習慣買新的。楊瑾說:「由女女出世到呢家,幾乎冇買過衫畀佢。有人送玩具畀佢,我要佢送番一件出去,等佢知物品有價值,唔可以隨便丟。」

最好學校推動 家長會願意參與
誠徵了近一個月,終於有家長聯絡說可以送出校服。「同女女一齊去攞校服,我同佢講校服係姐姐畀佢,佢好開心。我哋仲買咗啲生果同餅回禮,我覺得呢個經驗係有回憶嘅。」楊瑾也形象化地向佢解釋捐錢到環保組織的舉動。「佢當然唔會知乜嘢係組織。佢好鍾意bear bear熊,我就同佢講我哋捐錢畀幫bear bear熊嘅人,等bear bear熊名可以繼續喺北極生活。」

舊衣保存得怎樣企理,都可能給看出是舊的,問她有否擔心童言無忌,女女會被語言傷害?「鍾唔鍾意一樣嘢好受大人影響,就睇你點樣同佢講,你話二手物品好好,有感情,佢一樣會咁諗。」楊瑾認為學校是最好的平台,協助舊生捐出校服予新生。「有官方推動力,家長會願意參與, 目的係環保惜物,一定唔會有家長反對。」她也希望沒必要的話,學校不要經常更改校服款式,造成不必要浪費。

記者:葉青霞
攝影:伍慶泉
(部份圖片由受訪者提供)

2017果籽繼續認真知味。識買惜用。行以求知。好事多為。重修舊好。
緊貼果籽報道,即like:http://fb.me/AS.AppleDaily


楊瑾認為不用向小朋友刻意「灌輸」環保意識,身教才最重要。

楊瑾徵到的夏季校服裙是加大碼,幸女女算高大,修改一下,還算合身。

楊瑾徵來的夏季與冬季校服,包括多件外套及皮鞋狀態良好。

楊瑾表明徵得校服,會把買校服錢捐出。她最後捐出$800予「綠惜地球」。

送出校服的朱詩懿(右)小朋友。

群組的二手校服相片看來簇新,大部份一百幾十有交易,也有家長免費送出。

回到最上面