蘋果日報  動新聞
台灣  香港 
State Farm 贊助

【病向淺中醫】曾因失戀喪父患情緒病 李若彤感激發哥當頭棒喝

李若彤喺90年代拍過唔少電視劇,當年佢嘅「仙氣」真係出晒名,之後喺2000年代仲北上發展,喺04年拍完《大宋驚世傳奇》之後就淡出幕前,直至2013年復出拍《女人俱樂部》,神隱近十年原來李若彤曾經喺呢段時間患上情緒病。

李若彤曾經接受《蘋果》專訪講到當時工作令佢身心疲累,加上當時另一半商人郭應泉唔想佢工作,而淡出幕前,雖然李若彤為愛放棄事業,不過佢嘅戀情未有開花結果,08年同男友分手,失戀令佢頓時迷失自我,不過咁都未算最差,喺09年李爸爸中風。

而李若彤喺失戀、父親患病雙重打擊下患上抑鬱症,仲一度想輕生,佢話:「感情分開係潛伏點,跟住爸爸病係爆發點,爆發到有情緒病,有諗過自殺!企喺街,無端端諗行出馬路會點呢?有衝動想做呢樣嘢,係唔知點解。幸好上天畀個姨甥女我,湊佢係我最開心嘅時間,亦係佢救咗我,多謝妹妹畀我做媽媽嘅經驗。」之後李若彤睇醫生治療,喺藥物幫助下情況一度好轉,不過及後爸爸離世令佢嘅情緒病復發,再食兩年藥之後情況先至穩定。

喺訪問中,李若彤話除咗將湊姨甥女視為寄託,仲多謝一位朋友當頭棒喝,講緊嘅就係發哥(周潤發),李若彤話:「舊年11月喺大陸工作返港機上遇到發哥,佢問我仲有冇諗拍戲?我話冇,佢話人點可以唔做嘢㗎,佢講完我突然醒一醒。佢仲問我有乜興趣?我話鍾意運動煮嘢食,佢就話去考個健身牌,或好似謝寧咁,將興趣發展成事業。」佢仲多謝發哥引導佢去思考,之後仲有緣復出拍劇o添!



回到最上面