蘋果日報  動新聞
台灣  香港 
State Farm 贊助

【救番一條生命】孫耀威8號風球遇流浪貓 帶返屋企杜蟲兼收養

【新增內容】

打大風,露宿者可以到政府開放嘅社區中心暫避,但流浪貓狗,在哪裏可以找一個遮風擋雨嘅地方呢?

今日8號風球高掛,孫耀威喺facebook貼流浪貓相片,留言:「颱風天這些流浪貓狗真的很可憐!她是小PEPPER,應該差不多4個月,雖然幫她臨時搭建了這個小窩,但她還是到處跑,我又不想關她在戶外的籠子裏,打雷她又會很怕,我是否應該再收留多一隻貓呢?!」網友紛留言叫老孫收留牠,指貓貓嘅眼神好可憐!

《蘋果》致電老孫了解,佢喺電話表示:「呢隻貓見咗佢有兩三個星期,喺我屋企門口成日出現,後來知道原來係我對面間屋,一對外國夫妻嘅family養緊,因為女主人對貓毛敏感,唔可以俾佢入屋,但一直有餵佢食嘢,我同Macy(老婆陳美詩)每次見到佢都會餵佢,噚日打風,我俾嘢佢食,佢好肚餓,有時風一大,佢又好驚,所以擔心佢。」

老孫坦言其實有衝動想抱貓貓入屋,但因為佢已經領養咗三隻貓,仲有一隻狗係朋友送:「因為屋企有4隻寵物,我打咗去貓義工度問,如果貓入屋首先要同佢整走蚤乸,再幫佢沖涼同杜蟲,先可以同其他寵物一齊,如果唔係驚啲病惹嚟惹去。而且有第二間屋養緊,唔知可唔可以攞走隻貓,但我好擔心佢,所以搭咗簡單嘅竇畀佢,擺咗啲貓糧同水,希望佢可以打風都有嘢食。」

然而,今朝老孫起身去教堂時見唔到貓貓:「我喵咗佢好耐都喵唔到,所以晏啲返屋企會繼續搵佢,今日打風出去希望可以買到滅蚤嘢,如果今晚再見到佢,會幫佢沖涼同收養埋佢,因為佢好得意,三色貓嚟,我屋企三隻貓都係公,狗都係公,佢係唯一一隻乸嘅寵物,我覺得好有緣份,因為佢好親我,希望可以收留埋佢,屋企多個生命。」

老孫言出必行,晚上佢將PEPPER帶咗返入屋,佢同《蘋果》講,今朝照顧PEPPER時試過被爪傷。老孫之後帶咗PEPPER去搵貓義工,檢查過後PEPPER可以返屋企,不過老孫仲嘗試緊餵PEPPER食杜蟲藥,晚上再遭爪傷,佢形容呢個係漫長抗爭。老孫又話:「唔可以放出嚟住,唔知身體入面會唔會有其他菌之類,暫時放入個籠裡面,等其他寵物習慣下佢啲味,做下friend先啦,希望佢哋可以長久啦。」老孫仲幫PEPPER改咗個中文名叫花椒女,真係好有愛心。



孫耀威用膠籃整咗個小窩俾流浪貓。(網上截圖)

(網上截圖)

孫耀威屋企已養咗3隻貓同1隻狗。(網上截圖)

有時狗狗Kobe都幾百厭。(網上截圖)

(網上截圖)

(網上截圖)

(網上截圖)

(網上截圖)

(網上截圖)

孫耀威同老婆Macy都好鍾意小動物,勁有愛心。(網上截圖)

老孫終於可以帶PEPPER入屋,仲用風筒幫佢吹番暖身體。

回到最上面