蘋果日報  動新聞
台灣  香港 
State Farm 贊助

【父親節】通宵更車長日做11個鐘養家 愛女撐爸爸做好呢份工

近年巴士意外頻生,外界關注巴士車長工時過長的問題。而在長工時的背後,往往是一個個犧牲與家人相處養活家庭的故事。城巴通宵更車長阿俊現時平均每日工作11小時,作息日夜顛倒,陪伴家人的時間難免不足,幸得愛女支持及體諒,「佢辛苦搵錢只為咗我哋嘅生活」,一句窩心話,令阿俊可更安心在外面打拼。

44歲的阿俊在城巴擔任車長逾8年,他一開始入職只揸正常更,後來因沙田區有通宵更空缺,自己又住在沙田,才決定轉更,一做就做7年。阿俊現時平均每日工作11小時,更試過「晚六朝六」連踩12小時,放工後大部份時間都用作休息,「早醒就有個零鐘頭幫個女睇下功課、做吓自己嘢,遲咗就真係要一起身就即刻返工」。留在家中的時間不多,他笑言「似酒店多過屋企」。最近阿俊一家更因租金問題搬到東涌,私人時間更是少之有少。雖然揸通宵更辛苦,但人工每月多約2,000元,為了家庭,他唯有苦撐,「唔返通宵更根本應付唔到一家三口開支」。

雖然日做11小時,阿俊仍然利用公餘時間擔任城巴職工會副理事長,為工友爭取合理權益。他坦言有猶疑過應否犧牲陪家人的時間處理工會事務,但認為「想要有成果,必定要有人企出嚟付出」。阿俊表示,工會未來希望為車長爭取同工同酬,因2004年後入職的城巴車長,無論在薪酬待遇抑或福利上都不及04年前入職的舊制月薪車長,以加班補水為例,舊制車長是以時薪1.75倍計算補水,04年後入職的車長則只以時薪1.5倍計。

對外阿俊為家庭奔波勞碌、為工友爭取權益,對內卻對愛女充滿愧疚及遺憾,顯得有心無力,「個女上台拎獎,我個心真係好想去,但奈何精神真係支持唔到,最後都冇去到」。幸好詩喬懂事,體諒及感激爸爸為家庭、為工會的付出,「佢辛苦搵錢只為咗我哋嘅生活」,指父親「一收工落車就會打畀我,關心我,又驚我有危險」,對此表示感動。父親節在即,詩喬打算畫張心意卡送給爸爸,以報答他為家庭的無私付出。

記者 麥卓溢


城巴通宵更車長阿俊(右)現時平均每日工作11小時,陪伴家人的時間難免不足,幸得愛女支持及體諒。李潤芳攝

即使放假,阿俊(右)坦言亦難帶女兒出外遊玩,只能與她在家中看電視、帶她外出吃飯。李潤芳攝

回到最上面